Год малой родины в Беларуси
2 июня, 2020

Інтэрнэт рэсурсы становяцца ўсё больш запатрабаванымі пісьменніцкай супольнасцю. Сайты, старонкі ў сацыяльных сетках як сталічнага, абласных аддзяленняў так і саміх пісьменнікаў — звыклая з’ява ў віртуальнай прасторы. Безумоўна, галоўная падзея для кожнага аўтара – выхад у свет кнігі, але і магчымасці інтэрнэта прыносяць свой добры плён, які падштурхоўвае пашыраць літаратурную дзейнасць у новым творчым фармаце. Асабліва гэта прыкметна зараз, калі пераважная большасць аўтараў працуе на так званай удалёнцы, і сеціва напаўняецца новымі змястоўнымі праектамі, звязанымі з літаратурнымі навацыямі. Паказальны ў гэтым напрамку вопыт магілёўскіх калег.

— Літаратурныя старонкі ў сацыяльных сетках, — кажа старшыня Магілёўскага абласнога аддзялення СПБ Алесь Казека, — сталі эфектыўным, зручным і перспектыўным сродкам інфармавання чытачоў пра літаратурнае жыццё Магілёўшчыны, знаёмства падпісчыкаў з асобамі і творчасцю магілёўскіх аўтараў, пашырэння кола новых партнёраў.

Асноўная работа МА СПБ ў інтэрнэце вядзецца з 2017 года на базе двух старонак у сацыяльных сетках «Вконтакте» и «Фейсбук». На сённяшні момант колькасць сукупных падпісчыкаў інтэрнэт-старонак аддзялення складае болей за 400 (плюс унікальныя карыстальнікі). Аб запатрабаванасці старонак сведчыць высокая актыўнасць прагляду навін, іх каментарыяў. Расце цікавасць і да саміх аўтараў, якія маюць магчымасць не толькі прадстаўляць свае выданні, але і весці адкрыты дыялог з чытачом.

Развіццю літаратурнага працэса спрыяе і літаратурна-крытычная дзейнасць: публікацыі рэцэнзій і водгукаў на творы. Таксама ўсё большую папулярнасць набывае літаратурна-конкурсная дзейнасць. За апошні час аддзяленнем праведзена 5 адкрытых інтэрнэт-конкурсаў: «Ветразь натхнення» (конкурс маладзёжнай беларускамоўнай паэзіі), «Мой бераг родны (конкурс беларускамоўнай патрыятычнай лірыкі), «Мяккая лапа» (міжнародны конкурс вершаў і прозы, прысвечаны Дню абароны жывёл), «Усмешка Сфінкса» (конкурс фантастычных вершаў і прозы), «Пад калядным небам» (конкурс прозы і лірыкі, прысвечаны Новаму году і Калядам прайшоў пры падтрымцы Магілёўскай епархіі БПЦ).

Стала традыцыяй пасля правядзення конкурсаў стварэнне электронных калектыўных зборнікаў, якія таксама размешчыны ў шырокім доступе ў сеціве.

На дадзены момант на старонках аддзялення аб’яўлена некалькі акцый. Сярод іх вельмі папулярная «Нашчадкі Перамогі», дзе аўтары аддзялення і падпісчыкі старонак дзяляцца ўспамінамі аб сваіх родных – удзельніках Вялікай Айчыннай вайны. Гэта багаты скарб памяці і ўдзячнасці папярэднікам за іх неўміручы подзвіг.

«Спытай пісьменніка» — так названы цыкл дыстанцыйных інтэрв’ю, створаных паводле пытанняў, дасланых падпісчыкамі ў адрас літаратараў Магілёўшчыны. Дзякуючы чаму чытачы знаёмяцца не толькі з кнігамі, але і з поглядамі іх аўтараў на розныя бакі жыцця. Тым самым уздымаецца аўтарытэт пісьменніка, як творцы, асобы.

Акцыя-конкурс «Больш крытыкі» арганізавана з мэтай заахвоціць чытачоў да напісання водгукаў і рэцэнзій на кніжныя навінкі пісьменнікаў магілёўскага краю.

— Нашы старанні накіраваны на прапаганду літаратуры, чытання, далучэння падпісчыкаў да дыялогу аб культурных каштоўнасцях, — так Алесь Казека ацэньвае гэты напрамак дзейнасці тутэйшага аддзялення і згадвае пра новыя творчыя планы работы ў сеціве.

Як, у прыватнасці, сваё месца ў віртуальнай прасторы ўпэўнена ўмацоўваюць і іншыя аддзяленні. Напрыклад, пісьменнікі Віцебшчыны ў фармаце анлайн арганізуюць сустрэчы з чытачамі. Вялікі рэзанас меў дыялог старшыні аддзялення Тамары Красновай-Гусачэнка з выхаванцамі Нацыянальнага адукацыйна-аздараўленчага цэнтра «Зубронак». А пісьменнікі Міншчыны скарыстоўваюць магчымасці інтэрнэта для большай прапаганды беларускай літаратуры за мяжой, вядуць актыўную перакладчыцкую дзейнасць.

Добавить комментарий

Этот сайт использует Akismet для борьбы со спамом. Узнайте как обрабатываются ваши данные комментариев.