Год малой родины в Беларуси
30 января, 2020

У Мінску ёсць унікальнае месца, якога няма больш ні ў адным горадзе свету — Парк пісьменнікаў. Ён з’явіўся ў лістападзе 2018 года побач з Нацыянальнай бібліятэкай Беларусі па ініцыятыве нашай пісьменніцкай арганізацыі і пры падтрымцы Мінгарвыканкама.

Пісьменнікі да гэтай падзеі аднесліся вельмі радасна, і не толькі таму, што спрычыніліся да адной з самых высакародных спраў — пасадкі дрэў, але і атрымалі магчымасць выкарыстоўваць гэта знакавае ў беларускай сталіцы месца як цэнтр прыцягнення ўсіх, хто любіць кнігу, захапляецца чытаннем, хто цікавіцца славутасцямі сталіцы.

У ліку наведвальнікаў Парка — жыхары Мінска, госці, турысты.
Парк пісьменнікаў — гэта свайго роду сімвал вялікай пісьменніцкай супольнасці.

Як вядома, СПБ быў створаны ў 2005 годзе і дзейнічае ў адпаведнасці з Указам Прэзідэнта Рэспублікі Беларусь № 564 «Аб некаторых пытаннях дзейнасці грамадскага аб’яднання» Саюз пісьменнікаў Беларусі «. СПБ з’яўляецца правапераемнікам таго аўтарытэтнага пісьменніцкага Саюза, ля вытокаў стварэння якога стаялі класікі беларускай літаратуры Янка Купала і Якуб Колас.

На дадзены момант у Саюзе пісьменнікаў Беларусі налічваецца больш за 700 чальцоў. У кожнай вобласці ёсць сваё аддзяленне. Самае вялікае прадстаўніцтва літаратараў у сталіцы, дзе як і па ўсёй краіне, працуе шмат літаратурных гурткоў, клубаў, ёсць свой Тэатр паэзіі. Пісьменнікі ствараюць свае творы і для дзяцей, і для дарослых, каб людзі не згубіліся ў свеце бездухоўнасці, станавіліся дабрэй, сумленней. У год праходзіць больш за 20 тысяч рознага роду мерапрыемстваў, калі пісьменнікі нясуць у грамадства «жывое» слова.

Парк пісьменнікаў варта разглядаць як шматзначны аб’ект. Ён сведчыць аб духоўнасці беларусаў, як нацыі, пра разуменне беларусамі ролі кнігі, важнасці чытання, значнасць якога ўсё больш узрастае ў свеце.

Пасаджаныя ў Парку пісьменнікаў дрэвы, (побач з намі ў той момант былі і прадстаўнікі музеяў, бібліятэк), ужо зашумелі сваёй лістотай. Па рашэнні дызайнераў тут расце «жывая» кніга, сфарміраваная з групы кустоў, а таксама ўстаноўлены камень у гонар гістарычнай падзеі — стварэння парку, закладзена капсула з імёнамі тых, хто спрычыніўся да высокароднай справы.

Паркавая зона становіцца ўпрыгожаннем сталіцы, аднак, патрабуе і далейшага развіцця.

Айчыннай літаратуры ёсць чым здзіўляць свайго чытача. А магчымасці Парку, як культурнай пляцоўкі, не рэалізаваны ў поўнай меры.

З гэтай мэтай у Саюзе пісьменнікаў ствараецца рабочая група з найбольш актыўных літаратараў. Яны будуць садзейнічаць новаўвядзенням у Парку. Да таго ж, Саюз пісьменнікаў у чарговы раз звяртаецца ў Мінгарвыканкам з просьбай далейшай падтрымкі і дапамогі ў вырашэнні дадзенага пытання.

СПБ заклапочаны распрацоўкай праекта добраўпарадкавання тэрыторыі Парку пісьменнікаў, дзе неабходна прадугледзець устаноўку памятных таблічак, разбіць алеі ў гонар знакавых пісьменнікаў, павялічыць лік лавак уздоўж алей і набярэжнай, дадаткова пасадзіць дрэвы і кусты для візуальнага выдзялення тэрыторыі парку на фоне навакольнага ландшафту.

Таксама бачыцца неабходным на схіле паміж будынкам Нацыянальнай бібліятэкі Беларусі і набярэжнай р. Свіслач абсталяваць пляцоўку з летняй сцэнай і радамі лавак, прыдатную для арганізацыі розных мерапрыемстваў з боку пісьменніцкага Саюза (творчых сустрэч пісьменнікаў, правядзення аўтограф-сесій, літаратурных вечароў, дзён Паэзіі, урокаў Мужнасці, дэманстрацыі спектакляў, спаборніцтваў чытальнікаў, узнагароджання пераможцаў розных творчых конкурсаў ). У дзейнасці такой творчай галерэі зацікаўлена і Нацыянальная бібліятэка Беларусі, наведвальнікам якой цікава зазірнуць у літаратурную зону адпачынку.

Дадзеная пляцоўка можа быць выкарыстана ў праграмах Дня горада, Дня Незалежнасці Рэспублікі Беларусь, іншых святаў, якія праводзяцца пры падтрымцы устаноў Мінгарвыканкаму і Міністэрства культуры, лічаць у СПБ.

Акрамя таго, адной з першачарговых задач СПБ вызначае стварэнне і размяшчэнне ў Парку пісьменнікаў скульптуры, прысвечанай «чалавеку, які чытае».

Архітэктурныя фантазіі на гэтую тэму ёсць у розных гарадах свету. Яны ўпрыгожваюць абліччы гарадоў, надаюць ім арыгінальнасць. Настаў час і ў беларускай сталіцы мець свой варыянт такога шэдэўра архітэктуры.

Увогуле ў Парку пісьменнікаў могуць быць устаноўлены і іншыя аб’екты манументальнага мастацтва — помнікі ў гонар пісьменнікаў ці кампазіцыі, звязаныя з літаратурнымі героямі. Задзейнічанай у рэалізацыі гэтых планаў можа Беларуская дзяржаўная акадэмія мастацтваў, з якой у Саюза пісьменнікаў Беларусі ёсць вопыт супрацоўніцтва ў гэтым напрамку. Дарэчы, першапачаткова праект будаўніцтва Нацыянальнай бібліятэкі Беларусі прадугледжваў стварэнне побач з ёй культурнай зоны, пра добраўпарадкаванне якой зараз турбуецца СПБ.

У СПБ перакананы, што прапановы, якія хвалююць увесь пісьменніцкі Саюз, не застануцца па-за ўвагай кіраўніцтва горада і Парк пісьменнікаў стане больш змястоўным здабыткам сталіцы, нашым агульнам гонарам, будзе прыцягваць сваёй прыгажосцю, літаратурным інтарэсам, высокай культурай.

Алена Стэльмах

Добавить комментарий

Этот сайт использует Akismet для борьбы со спамом. Узнайте как обрабатываются ваши данные комментариев.