Журналіст і пісьменнік Алена Стэльмах узначальвае часопіс «Родная прырода»

Так называется часопіс, які выходзіць у Беларусі з 1972 года. Розныя аўтарскія калектывы стваралі выданне. Адназначна тое, што ўсе яны былі вялікімі аматарамі прыроды і сваё захапленне ёю імкнуліся перадаць чытачу. З любімым часопісам раслі пакаленні чытачоў.

Сучасны часопіс «Родная прырода»  падтрымлівае лепшыя традыцыі сваіх папярэднікаў— яго старонкі напоўнены трапяткім стаўленнем да ўсяго жывога, што мацуе свет.  Аднак, з цягам часу, калі экалагічныя праблемы ўсё больш абвастраюцца, а экалагічныя катастрофы наносяць прыродзе велізарную шкоду, голас часопіса гучыць усё больш упарта ў абарону навакольнага асяроддзя.

Са жніўня 2016 года часопіс узначальвае Алена Стэльмах. Значны час свайго творчага жыцця яна прысвяціла беларускаму лесу.  Сем гадоў Алена Анатольеўна ўзначальвала штотыднёвік лесаводаў — «Белорусскую лесную газету».  Цяпер прыхільнасць да абранай тэмы журналіст і пісьменнік будзе выказваць на старонках «Роднай прыроды«.

У жнівеньскім номеры «Роднай прыроды» Алена Стэльмах дзеліцца ўражаннямі ад наведвання Рагачоўскага краю, дзе ў першыя выхадныя верасня пройдзе ў ХХІІI раз Дзень беларускага пісьменства.